Quando jintri a méssa tu, bella Maria,

ogni omu pu guardartu su ruvòta,

i tu gli fa puccà du bramusìa

ca gli còre i la ciòcca ci s'arrota.

===

Tu fa cala gli santi dalla còna,

i fa addannà gli prètu cu cunfèssa;

pure si tu sparagni da gni a méssa

Dio, cu tutto vede, tu purdona.

===

Mentre cu t'affacciavi alla ringhiera

gli sole scéva da mont'Radicìno;

gli sole nasci pu scallà la tèra,

i tu si nata pu scallà Pappinu;

gli sole cala i su scura la séra,

tu celi tu, jé trìbbulo, tapino.

Famme 'na grazzia almeno, bella figlia

fammo 'na pupa cu t'arassumìglia.

===

Stéva addurmita jinòtte, i mu so 'ntìsa

chiama dalla finèstra, doci, piano;

'ncima agli lètto arivi i mu so assisa:

era 'Mbrosiùcci cu 'na ròsa 'mmano

M'ha ditto bella mia, vatti a ripòsa

ch'appéna mu congèdo sarai spòsa.

===

Tu so 'ncontrata a spasso alla Scarpétta

cu gli curagli i fazzolétto 'n testa;

parivi du gli celo 'n'angiolétta,

èri la più carina dulla fèsta;

d'occhi cortési tacivi l'incètta,

però, bellina, abbassa chéssa crésta.

===

Peppìno pota, taglia i mu prepara,

jé facci gli fascini i la riccèlla,

ca si 'stu mmérno tira la strinèlla

cu chisti zippi ci facci la fìàra.

===

Bellézza cu va' p'acqua alla funtana

cu gli cuncone mmani i cu la croglia,

quando rupàssi appontuto a 'sta sòglia,

damm 'na gliotta d'acqua ch 'arassàna.

===

O tortorèlla cu rucrùmi 'n gabbia,

si accomme a Rosa ca 'sta 'n clausura:

gli padre l'ha runchiusa 'n quattro mura

i nu ci stamo a strùi pu la ràbbia.

O palommèlla cu tu porti 'mmocca

chisso ramo du liva,

pòrtumo chella paci, ca, cattiva,

mu nega ancora chella amata còcca.

===

Bèlla, cu su mussìtto da ciràsa,

i cu chiss'occhi si la calamità

ch'attira pure gli àngili a ssa casa:

schitto cu meco tu fa la 'mpunìta.

===

Bèlla, nun è pu ti ssa vita dura,

ca ssa bellézza 'n po' rumanì fora:

si nata p'abbità drénte allu mura.

Fiore du lino,

tu facci la proméssa da cristiano:

jé tu pòrto a abbità drente a Frintìno.

===

I la ragazza me' sta fòri pòrta,

sa tèsse, ricama, sa fa la sarta,

amore i scudi a casa mu rupòrta.

===

Lui - Bella, cu si arammòrta mo la lùma,

quando sta culucàta a chisso lètto

accantona nu crèddo chessa 'ncrùma,

pensa alla fiàra cu mu brucia 'n petto.

Lei - Amato, si gli petto a ti tu sfìàra,

a mi gli còre avvampa accomme a' vràci;

si jé t'aggrado, tu, begli, mu piaci,

ma a nun capirci prò facìmo a gara.

===

Lui - O bella Ròsa,

màmmuta t'ha serrata drento a casa,

tu fa la sentinèlla ch'è gelosa.

Lei - Mamma è gilosa,

mu fa la sentinèlla, mu tè' chiusa,

nun pensa ca stu còre nun ha pòsa.

===

Lei - Fiore du pruno,

natura du beltà t'ha fatto dono,

i caro accomme a ti 'n ci sta niciùno.

Lui - Fiore du pruno,

la più preziosa si' dugli rióno,

du grazia i du virtù si gli aradùno.

===

Lui - Cara, tu tè' pu mamma la Fortuna,

si nnata certo alla stagione pièna,

si truvàto ammannìto pranzo i céna:

quando nascìsti s'appunta la luna.

Lei - Quando nascìsti tu, caro Peppino,

gli celo certamente era seréno,

i la contrada tutto nu giardino.

===

Fiore du noce,

jé vogli fa agli amor cu chi mu piace,

cu chi mu 'mprèsta la voccùccia doce.

===

Fiore du ménta,

chi tè' la mogli bèlla sempre canta,

chi tè' quatrini tanti sempre cónta.

===

Bella bella,

più bella tu fa fa chi tu su piglia,

la notte tu fa fa la sentinèlla.

===

Fiore ch'addorà,

t'appozzi mette attorno che tu para,

si sempre nu struppóne nato fora.

===

Fior du ginestra,

'ntu vale cu tu mitti sempre 'n mostra

a fa la ciuvittèlla alla finèstra.

===

Quando nascisti tu, 'ssa 'ngannatòra,

nascì 'na linguacciuta, 'na bannèra,

chi tu su tògli a ti, male s'assora.

===

Tu, cu tu si sposata 'ssa frastéra,

mo fa da contrabbasso alla fanfara,

dugli cornuti si' porta bandièra.

===

Tu va dicènno ca so 'na ciuvìtta,

purché 'n so stata sórgi pu la gatta;

di' ca 'n si diggirìta la sconfitta:

ca a ti chi 'n tu cunosci tu s'accatta.

===

Fiore du gigli,

tu la ventura tu la porti 'n cògli,

tè' più fortuna du nu cucuzzìgli.

===

Lei - Ma che ci passi a fa pu chésta via

si chella cu vulìvi 'n'è più tua:

jé tu facci morì du gelosìa.

Lui - Passo pu chésta via a piacimento;

'n pàto du gelosìa ne rimpianto,

ca du chésse assusì nu trovo cento.

===

Lei - Brutto, si nu pallócco sfarinato,

mu pari nu pantùfo mal crisciùto,

si accomme agli pappóne ammalluzzàto,

pari gli 'nfrascarégli cutufùto.

Lui - Brutta, cu su mussìtto da putàta,

mu pari 'na ranónchia du palùda,

mu pari 'na gallina spennacchiata,

'na sóruca du chiàvica, baffuta.

===

Bella cu si arammòrta la cannéla,

nun mu fa più pena. Rosina, cala;

sbrigati bella, ca la strina pela.

===

Fior du limone,

si chisso musso té' fusse du pane,

m'arajàrìa senza fa n'uccone.

===

Fior du trafogli,

gli amore gli si fatto cu gli mègli,

niciùno prò tu s'ha tota pu mogli.

===

Lei - Cacciavi tanto fiato dagli petto,

cantavi aracanìto, alla spianata,

pu fa sentì nu stornèllo a duspétto.

Lui - Jé canto sempre sempre a sguarciagola,

chéllo cu tengo 'n petto tengo mmocca:

tu si offésa ca già stivi 'n dola.

===

Bella ch'azzicchi lesta pu sa scala,

pari 'na palommèlla quando vola,

n'angilo dugli celo senza l'ala.

===

Fior d'erba pazza,

si, zéca, brutta, racchia, 'na cucozza,

mu pari 'n'oca all'ara cu starnazza.

===

Fior du cucozza,

chi tu s'accosta a ti sente la puzza,

si brutta, scalcinata, sporca i zozza.

===

'N tu mette più alla faccia la farina:

t'aggiusti chisso musso cu fa péna,

si sempre brutta accomme a 'na faina.

===

Fiore di pero,

tè' nu mussìtto tanto, tanto caro;

fa arabbivà gli morti al cimitèro.

===

Fiore du rosa,

va' rumutàta accomme a 'na marchésa,

ma nun trovi niciùno cu tu sposa.

===

Fior du cirasa,

tu sperchi, tu rumìri, nun té' posa,

ma si sempre 'na pupa pu la casa.

===

Fior du cipresso,

ch'appozzi pure gni cent'anni a spasso:

nu cane 'n trovi cu s'abbia apprèsso.

===

Fior di mughetto,

s'annammora du ti solo nu matto,

purché si racchia, néccia i senza petto.

===

Fior du mentuccia,

accàpputo sa' ciòcca i chessa faccia,

purché si brutta, gobba i té' la cuccia.

===

Acqua corrente,

tu cridi d'esse bella i 'nteressante,

ma si 'na scigna ca nun vali gnènte.

===

Appóntuto 'na vota cu ssa lagna,

i vatti a rummunnà ca té la rugna,

i té' lu zécche pèggi du 'na cagna.

===

Si mamma nun mu da chella cu vogli,

mu faccio gli duspétto i mu gli tagli:

gli méttu pu punnacchio agli cappégli.